Dr Bethlehem-Run beherrscht uns. Ibrall amerikanischs Christmasgedudel ond Konsum- ond Glühweinrausch. Aber ’s goht au andersch. Ma ka dia Adventszeit au inwendig a Stickle weiter doba, em Herza erleba, net bloß mit hoißem Glühwei‘ em Ranza. Dodrzua lad i Sia härrdslich ei. I lad Sia ei zoma wirklich schöna Adventskonzert mit alte traditionelle Weisa aus onserm Ländle, dia ’s schonscht nirgends mai zom höra geit. Des fendet am Sonndich, 16.12., also am dritta Advent om Viere am Middag en dr FILharmonie en Filderstadt statt. I derf des moderiera: „Volksmusik zum Advent“.

Mit drbei send meine Stäffelesgeiger, mei Spundlochmusig, dui Ostelsheimer Stubenmusik ond dr DreiXang, drei jonge Fraua, die mit ihre Engelsstemmla wonderschö sengat, dia Klarinettenfreunde und no die schwäbische Theatergruppe „D’ Scheuraburzler“ aus Cannstatt. I dät mi jessasmäßig freia, wenn i Sie dort begrüßa dirft. I han extra a paar nette Gschichtla ond a Weihnachtsspiel „Drei Weise em Schwobaland“ für Sie gschrieba.

16. Dezember 2018, FILharmonie Filderstadt, Beginn: 16 Uhr, Einlass: 15 Uhr, Kartenbestellungen und Vorverkauf: Easy Ticket, www.easyticket.de, Telefon: 0711 2555 555, Mail: info@easyticket.de.

Übrigens: Wenn’r no a nett’s Gschenkle für eure Liebe suacha: Ta ta! Do isch’s: „Wulf Wagers Weihnachtsbüchle“. Do drenna send nette, luschtige, heiter-besinnliche Gschichtla, schwäbische Weihnachtslieder, alte Bräuch’, Bauraregla ond drei kurze Weihnachtsspiel’. Kurzom, a kurzweiligs Biachle. Erschiena isch des em Belser-Verlag, koschtet lächerliche 12,99 Eurona ond isch en jeder guata Buchhandlung en Stuegert ond Omgebong erhältlich. Ond wenn se’s net do hend, no kennat se’s ennrhalb von 24 Stond bsorga. Des war jetzt dr Werbeblock. Näggschd Woch gibt’s wieder a normale Weltbetrachtung.

Bis näggschd Woch’

Ihr

Wulf Wager

kolumne@wulf-wager.de