I woiß net, ob Sie wissat, was en Thermomix isch? Des isch a total a’gsagte Küchamaschee. Hätt jo au dr Heizungsinstallateur bei Asterix ond Obelix sei könna. Aber noi, des isch a Küchamaschee, dia so ziemlich älles ka aus Überweisunga em Onlinebanking ausführa. Nadierlich hot mei Nochbere – Sia wissat jo, des propere 150-Kilo-Prachtsweib – so a Maschee braucht. Koscht jo au bloß ebbes über tausend Eurona.

Guat, wenn se en dr Woch acht Liter Eierlikör trenkt, no hot se des schnell wieder henna. Jetzt hot se sich mit ihre Freindinna wia äll Johr zom gemeinsama Maultaschamacha vor Gründonnerschdag troffa. No hot se dapfer ihren neua Thermomix mitgnomma zom a bissle ageba ond zom die Zwiabla ond den ganze Kloikruscht kloizomhäcksla. Jetzt muss i gschwend über ebbes aufklära, damit Sie dem Fortgang von derra Gschichte folga kennat: An den Thermomix kann mr a klois elektronisches Gerät, dr Cookidoo, in dr Größe vo mal halba EiFon per Magnet feschtmacha ond dort Rezepte direkt ronterlada.

Mein Nochbere hot jetzt aus Praktikabilitätsgründ den Cookidoo en den Mixtopf von dem Thermomix neiglegt, dass der beim Transport net vrlora goht. Bei ihrer Freundin akomma, hend die Weiber nadierlich sofort erscht mol batscht ond Eierlikör tronka, bevor se agfanga hend, dia Fülle für die Maultascha zom macha. Des isch jetzt a bissle stereotyp ond ogendermäßig, aber so war’s halt. Irgendwann isch dui Maultaschaproduktio no losganga ond mei Nochbere hot die Landjäger, die in die Fülle hättat komma solla, en den Thermomixtopf gschmissa ond ihre Freindinna, die ganz neidvoll auf die selbschtkochende Maschee guckt hend, drieber informiert, dass es glei a bissle laut wird, wenn des Messer vom Thermomix die Landjäger zerschreddert.

Los isch’s ganga. Aber irgendwie war des lauter wia normal. Jetzt hot mei Nocbere denkt, ’s wär vielleicht so a Metallringle von ra Landjäger mit in den Mixtopf groota. Also hot se gstoppt ond neiguckt. Do hot se fei net schlecht glotzt, wo ra ufgfalla isch, dass se den Cookidoo em Topf vrgessa hot, den dr Thermomix mitsamt de Landjäger fein säuberlich zerhäckselt hot. Ond was lernat mir do draus? Z’erscht schaffa, ond no batscha ond saufa. So isch no au wieder.

 

 

Bis näggschd Woch’

Ihr Wulf Wager

kolumne@wulfwager. de